თავდებობა

რა არის  თავდების სოლიდარული პასუხისმგებლობა?

თუ თავდები კისულობს პასუხისმგებლობას სოლიდარულად ან სხვა თანაბარმნიშვნელოვანი სახით, მას შეიძლება წაეყენოს მოთხოვნა იძულებითი აღსრულების მცდელობის გარეშეც, თუ ძირითადმა მოვალემ გადააცილა გადახდის ვადას და უშედეგოდ იქნა გაფორმებული, ანდა მისი გადახდისუუნარობა აშკარაა.

გსურთ დაეხმაროთ ახლობელს სესხის აღებაში, დაუდგეთ მას თავდებად და გააფორმოთ თავდებობის ხელშეკრულება, რომლითაც სოლიდარულად იკისრებთ პასუხისმგებლობას?

• შემდგომი გაურკვევლობისა და გართულებების თავიდან ასაცილებლად ყურადღებით გაეცანით გასაფორმებელი ხელშეკრულების პირობებს;

•  არ მოაწეროთ ხელშეკრულებას ხელი მანამ, სანამ არ მიიღებთ სრულ ინფორმაციას იმ ვალდებულებების შესახებ, რომლებიც მისი გაფორმების შედეგად დაგეკისრებათ.

წინააღმდეგ შემთხვევაში:

სასამართლო განხილვის ეტაპზე ძალიან რთული იქნება იმის მტკიცება, რომ თავდებს შეგნებული არ ჰქონდა თავდებობის შინაარსი, რადგან:

• დოკუმენტზე (ამ შემთხვევაში - თავდებობის ხელშეკრულებაზე) ხელის მოწერა არის დოკუმენტის გაცნობის, მისი შინაარსის გააზრებისა და შედეგების გაცნობიერების საფუძველი. 

გახსოვდეთ:

თუ მოვალე არ შეასრულებს ნაკისრ ვალდებულებებს, კრედიტორი უფლებამოსილია:

• მიმართოს სასამართლოს და მოითხოვოს სააღსრულებო ფურცელი თანხის იძულებით ამოღების თაობაზე;

• აღნიშნულ სააღსრულებო ფურცელში მოვალედ დასახელებულია თავდები და ვალის გადახდა მთლიანად მას ეკისრება.

გაითვალისწინეთ!

აღსრულების ეროვნულ ბიუროში თავდებობის საკითხთან დაკავშირებით შემოსული სააღსრულებო საქმეებიდან დაახლოებით 30-40%-ს თავდები ფარავს.

აქვს თუ არა თავდებს უფლება, მოითხოვოს მის მიერ გადახდილი თანხის დაბრუნება ძირითადი მოვალისაგან?

თუ თავდებობის საკითხთან დაკავშირებული საქმის აღსრულების შემდეგ თავდები სრულად დაფარავს სოლიდარული თავდებობის ხელშეკრულებით გათვალისწინებულ თანხას, კრედიტორის მოთხოვნა ძირითადი მოვალის მიმართ მასზე გადავა. შესაბამისად, თავდებს მიეცემა შესაძლებლობა, სასამართლო წესით იდავოს მის მიერ გადახდილი ვალის ძირითადი მოვალისათვის დაკისრებაზე.